A alcaldesa, Inés Rey, reuniuse hoxe en Madrid co ministro de Transformación Digital y de la Función Pública, José Luis Escrivá. No encontro, que tivo lugar na sede do ministerio, Rey e Escrivá abordaron polo miúdo o calendario de cara á posta en marcha da Axencia Española de Supervisión de Inteligencia Artificial (AESIA) na Coruña.

Neste sentido, o prazo para a presentación de candidaturas para dirixir a institución rematará mañá, xoves 9 de maio. Será xa posteriormente cando o comité de avaliación se reunirá para analizar as candidaturas existentes. A previsión do ministerio é que a nova directora ou director da axencia sexa nomeado antes de finais de mes.

Toda vez se designe á persoa que estará á fronte da dirección da AESIA, comezará o proceso de selección de persoal. Será, previsiblemente, no vindeiro mes de xuño, co obxectivo de que a axencia entre en funcionamento o antes posible.

O edificio da Terraza, unha cesión do Concello ao ministerio

En decembro de 2022, o Goberno de España deu a coñecer a elección unánime da Coruña como sede para albergar a Axencia Española de Supervisión de Inteligencia Artificial (AESIA), que acollerá un edificio histórico da cidade, a Terraza dos Xardíns de Méndez Núñez.

Na súa conversa de hoxe, Inés Rey e José Luis Escrivá destacaron os avances no convenio mediante o cal o Concello cederá a Terraza ao Ministerio de Transformación Digital y de la Función Pública con vistas ao inicio da actividade na AESIA.